Հայաստանի անտառային դաշինքի նպատակները հետևյալն են.

• Հանդես գալ հօգուտ Հայաստանի անտառների պաշտպանության և կայուն կառավարման
• Նպաստել և աջակցել Հայաստանում անտառների վերականգնմանը և անտառածածկույթի ավելացմանը
• Պաշտպանել և աջակցել Հայաստանում կենսաբազմազանության պահպանմանը
• Բարձրացնել հանրային իրազեկվածությունը անտառների և ընդհանրապես ծառերի կարևորության, Հայաստանի զարգացման և ապագա սերունդների կյանքի համար դրանց առանձնահատուկ նշանակության, ինչպես նաև անտառների հետ կապված բոլոր այլ խնդիրների վերաբերյալ

2026 թվականին Հայաստանի անտառային դաշինքը կենտրոնացնում է իր օրակարգը երեք փոխկապակցված առաջնահերթ ուղղությունների վրա, որոնք հանդիսանում են մասշտաբային անտառապատման աշխատանքներ իրականացնելու համար հիմնական խոչընդոտները Հայաստանում․

1. Հարկային օրենսդրության փոփոխությունների ազդեցությունը անտառապատման և անտառվերականգման գործունեության վրա

Դաշինքը 2026 թվականին առաջնահերթ է համարում հարկային օրենսդրության 2023թ․-ից ուժի մեջ մտած փոփոխությունների բացասական ազդեցությունը անտառապատման և անտառվերականգնման ոլորտում գործող կազմակերպությունների գործունեության վրա։
Այս շրջանակում Դաշինքի ուշադրության կենտրոնում են՝

• հարկային քաղաքականության այնպիսի մոտեցումների կիրառումը, որոնք չեն խոչընդոտի անտառապատման ծրագրերի իրականացումը և կխթանեն հանրային շահին ուղղված գործունեությունը։

Այս պահին Դաշինքը մշակում է  իրավական առաջարկությունների փաթեթ՝ հիմնված գործող իրավակարգավորումների, այդ թվում՝ միջազգային փորձի վերլուծության վրա, որը կներկայացնվի համապատասխան պետական մարմիններին։

2. Հողերի կադաստրային նշանակության և հողօգտագործման հարցը՝ անտառապատման նպատակով հողերի հասանելիության ապահովման համատեքստում

Մասշտաբային անտառապատման հիմնական սահմանափակումներից մեկը հողօգտագործման հետ կապված խնդիրներն են։
2026 թվականին Դաշինքը առաջնահերթ է համարում՝

• անտառապատման նպատակով հողերի հասանելիության իրավական խոչընդոտների վերհանումը,
• հողերի նշանակության փոփոխության կամ ճկուն կիրառման հնարավորությունների ուսումնասիրությունը,
• համայնքների կողմից անտառների կառավարման հետ կապված օրենսդրական բացերի վերհանումը
• միջազգային փորձի վերլուծությունը և դրա կիրառելիության գնահատումը Հայաստանի պայմաններում։

Դաշինքը նպատակ ունի ձևակերպել իրավական և քաղաքական առաջարկներ, որոնք կնպաստեն անտառապատման համար համապատասխան հողային ռեսուրսների հասանելիության ապահովմանը։

3. Շրջակա միջավայրի ազդեցության գնահատման (ՇՄԱԳ) գործընթացների բարելավումը անտառապատման համար 2026 թվականին Դաշինքը նպատակ ունի՝

• վերլուծել գործող ՇՄԱԳ կարգավորումները անտառապատման ծրագրերի կիրառման տեսանկյունից,
• բացահայտել գործընթացում առկա վարչարարական և գործնական խոչընդոտները,
• մշակել պետական աջակցության և ընթացակարգային պարզեցումների հնարավոր տարբերակներ՝ առանց շրջակա միջավայրի պաշտպանության մակարդակի նվազեցման։

Այս ուղղությամբ Դաշինքը հանդես է գալիս որպես մասնագիտական քննարկումների հարթակ՝ ապահովելով ոլորտային փորձի և տվյալների ներգրավումը։